KA ZAHPI LO

Nihin Thawngṭhabia kan relmi ah Jesuh nih a zultu hna ralrinnak a pek hna nak kong kan hmuh. “Miza pi hmaiah a ka ṭanhmi cu Mi Fapa nih, Pathian vancungmi hna hmaiah, a ṭanh ve hna lai” (Lk 12:8) tiah a ti hna. Cu hnuah Jesuh nih “nangmah ta ka si lo tiah zapi hmaiah aa phehmi cu, Pathian vancungmi hna hmaiah Mi Fapa zong nih, ka ta nan si lo” tiah a ti ve hna lai (9). Hi hi a ṭhawng taktak mi “Bia” an si!

Mi tam deuh nih kan “Bia” in ‘Jesuh kan hlawt lai’ timi cu ka zum tuk lo. Sihmanhsehlaw, kan tuahsernak le tuah hnga dingmi tuah lonak in Jesuh cu kan hlawt men lai. Jesuh nih kan chimmi lawng kan tuah lai timi cu a duh lai lo. “Kan zumh tiah kan chimmi hna kha kan tuah hrimhrim lai” timi kha Jesuh nih aa ruahchan mi a si.

Nihin ah minutes 10-15 caan lak in nangmah le nangmah i hal ding le na lungthin i dah dingin kan sawm hna. Ka chimmi le ka zumhmi hna kha ka tuah taktak maw? Ka chimmi sining hna in ka nung taktak maw? Ka thazaang dernak hna hi khoika ah dah an um? Ka nunnak ah zeibantuk hmun hna ah dah zumhtlak sinak in ka bia ka fehter?

 Nifatin kan nun kan karhlaannak ah kan chimmi hna kha pakhat hnu pakhat tuahkhawh i zuam a herh. Si kan duh tukmi minung sining kha zei sining dah a si? Nihin ah si na duhmi minung si i zuam ko. Ahohmanh nih an in hngal men lai lo. Na nunnak zongah midang hna caah zohchunh awk minung pakhat na si kho. Jesuh sinah nai mer a si ahcun na duhmi sining na si khawhnak hnga caah Jesuh nih an bawmh ko lai. Jesuh nih an hlaw bal lai lo. Sihmanhsehlaw, a fekmi biakamnak le lungsaunak na ngeih cu a herh.