Mithiang Ignatius Of Loyola
Jesuits bu a dirhtu mithiang Ignatius cu Spain ram Loyola khua ah a chuak. Ralkap rianṭuannak in pawcawm a duh mi a saduhthah cu 1521 kum Panplona khua an kulh can chung miakpi kuan pakhat nih a ke a kiahter hnu ah chikhatte ah a rawk. Culioah kum 30 a ti cang. A damka ahcun a caan liamternak caah duhnak he pehtlaimi cauk kha a hal hna. Asinain lungriamnak a rak ngei lo. Mah cauk aiawh in Khrih nunzia kong le mithiang hna kong cauk tu kha an rak pek. Mah cauk hna nih cun a thinlung kha phundang in a um ter. “Anmah cu keimah bantuk minung pum a ngei mi an si ve ko lo maw, zeicahdah keimah zong hi anmah bantukin ka tuah khawh ve lai lo” tiah a rak ti. Cuccaan thawk in Jesuh Khrih ralkap si ding ah a lung aa thleng i Manresa khua i a ummi Zateih Sianginn ah a lut. Amah i Biaknak lei a hmuhtonnak cu minthang mi, thlarau lei he pehtlai mi nunzia cauk” ah an rak ṭtial. Mah cauk kha Pope Pius 15 nak nih Thlarau khamhnak lam lei kaltak i kilvennak ding ah a rumbik le thil zapi he aa pehtlai bik mi Thlarau lei upadi cauk tiah a thanh.
Jerusalem le Rome khua hna ah khan Pathian biak dingin a kal hnuah amah cu Siangbawi caannak caah a herh mi timhtuah nakah Bible lei fimnak tlinh dingin Paris khua ah a va kal. Mah ka ah cun Biaknaklei buthar pakhat a ser. Mah bu cu kum 1540 ah Jesuh bu (Society of Jesus) ti mi min in Pope Paul II nih a fehter. Mah hna bu i an aupinak cu “Pathian ṭhawnnak kha langhter ding caah” (Ad Majorem Dei Gloriam) a si. Mah hna i Thlarau lei le fimnak lei he pehtlai mi upadi le anmah i ralkap bantuk an upadi hna ruangah Jesuits phu hna cu Biakinn hna, Dawtnak he pehtlai mi tuahsernak hna in vawlei cung ramkip ah lungsau ngai in mission rian an ṭuan ve. Mithiang Ignatius cu amah i a caan kha Rome khua lawngah a dihter i cu kaa ahcun St. Philip Neri he hawikom an si. Athiang mi buthar kha hruaitu le lamhmuhsak nak riannganpi ruangah a ba tuk i 1556 kum ah lung daitein a thi.
Nihin thawngtha nih a kan chimmi cu – “mifimhna le mithiamhna sinin na thuhmi kha a thiam lo mi hna sinah na phuan” (Mt11:21). Mah Jesuh i bia kan vun zoh tikah Pathian cu theidantu bantuk asi. Zeicah tiah, Micheu sin ah cun a phuang i micheu hna sinah cun a thuh mipa he a loh. Sihmanh sehlaw, Pathian Vancung pennak kong cu mikip sinah zaran in a kan hmuhsak ko. A cohlangtu minung kan ikhat lo ruangah asi deuh. Micheu nih zeiruangah dah kan hmu, kan theih, kan hngalh kho lo, kan sualnak le kan palhnak le kan lungthin a hak caah asi. Tawidoinak lungthin kan ngei kho lo, kan lung a hak, midang sualnak kan ngaithiam kho lo. Mahruangah vancung pennak kong cu mifim le mithiam hna nih an hmu kholo mi hi asi. Ngahchia bantuk in fim a cawng duhmi, lungput tha a ngeimi, toidornak lungthin a ngei mi le bochannak lungthin kan ngeih lawng ah vancung pennak cu kan sinah phuang asi lai.
Dawtmi ulenau nang le kei cu vancung pennak kong hngalh dingah Jesuh nih a kan thimcang caah lunglawm u sih. Alleluia