A ṭapmi pawl he ṭap ve
Miṭhli tlater ding ningzak hlah tiin Bawinu nih a kan cawnpiak tiah Pope Francis nih a chim
Tap in miṭhli tlading ṭih hlah! Mitthli cu voikhat voihnih ah laksawng ṭha, thluchuah, lungthin zalonnak le remhṭhannak a si tiah mithiang hna nih an chimh tiah Pope Francis nih 23, April, 2022 zarhteni ah “Our lady Tears- Mithli a tlami Bawinu Mary” lungdonkua i thlacamtu minung 2800 he an i tonnak ah a chimh. Cu phu chungtel pawl cu Italy chaklei ram Treviglio in an si.
Cu lungkua cu kum zabu (16) i sakmi a si i tukum hi kum (500) a tlinnak kum zong a si. Cu lungkua a cannak kong hicu; Februay 28, 1522 kumah France ralkap pawl ralkut in an khuapi cu Bawinu Mary i a mitthli tla bu he thla a campiaknak thawngin an luat caah a si.
Pope nih anmah phu pawl he an iton tikah Khrihfa pawl i mitthli cu zumhnak caah siseh, kan ton cuahmah liomi harnak pawl kan lonh khawhnak caah siseh zeitluk indah a biapi timi kha Bawinu le Jesuh hna i an mitthli kha hrambunh in a chim.
Mitthli pawl cu Pathian zaangfah dawtnak i hmelchunhnak a si
Bawi Jesuh i ahmasabik Zultu a simi Bawinu Mary cu Pathian i zaangfah dawtnak hmelchunhnak in a tlami mitthli a si. Bawipa Jesuh cu kan sualnak ca le mi zapi hliamhma tertu ṭhatlonak hna caah a biapibik in; nautatnak a tuartu hna le sualnak ngeilo mi hna hmaput ternak ruangah a mitthli a tla bal. Pathian cu zungzal in zaangfahnak ngeitu, sualthlah thiamtu a si.
Ral i salcan hna caah nan mitthli tla u
Mary i a mitthli cu Pathian i mitthli a si. Ral zuunngaihnak ruang i a tlami mitthli a si. Raltuknak ruangah Ukrine lawng kha a hrawh lo. Raltuknak cu mikip kha sunghnak lei lawng a hmuhton ter. Teitu siseh, sungtu siseh rawhralhnak lawngte a si. Ahmaanmi biatak kha hmantonh in iton dingah ralṭha hna u sih. Ral nih amah he aa pehtlaimi vialte kha a hrawh dih. Ral a sunghmi lawnglawng nih tuar a silo. Ral teitu tiin aa ruatmi pawl zonghi an sung ve ṭhiamṭhiam. Ral cu mikip kha a hrawh cikcek.
Nu Mary cu diahnak le zaangfahnak i nu a si
A rauhhlan teah mizapi an dihlak le a biapibik in Ukrine le Rusia ram hna caah kan nu Mary i a thiangcemmi a lungthin sinah apnak tuahmi phillonak in Ukrine ah pehzulh in a cangmi raltuknak kha a rannak in a donghkhawhnak caah Mary i thlacam piaknak kan hal. Kan Nu Mary cu daihnak i Bawinu a si bantukin zaangfah thiammi nu zong a si. Kanmah hna i kan halduhmi hna kha amah i a thiangcem mi a lungthin sinah kan pekchanh. Daihnak Siangpahrang nu a simi Bawinu zongnih kan thlacam halmi daihnak kha a kan halpiak lai ticu a fiang.
A ṭapmi pawl he ṭap ve
Kan ṭah tikah ningzaklo dingin kan nu Mary nih a kan cawnpiak. Ṭahnak cu kan Pa Pathian le ulenau hna sinah a ṭhami phuannak le langhternak a si. Kan intuarmi harnak kha kanmah he aa tongmi hna sinah cheuhnak le hrawmnak a si. I hrawm icheuh thiamnak a si i cubantuk a tuarmi hna he kan iton tikah lungthin, mithmai panhte le lumte in a cohlan thiamtu kan sinak hnga, lung aa lawmmi hna he kan i lawmhṭi bantukin a ṭapmi hna he zong ṭahṭi ve ding a si. Atu chanthar ah cubantuk lungput cu an um tilo. A caan le a hmunhma ningtein ṭah kan thiam tilo. Kan nu Mary bantukin lungchung taktak in a ṭaptu le Lamkaltu Peter bantukin ngaihchihnak lungput tak he a ṭaptu tuchan mino an um tilo.
Ṭap thiamnak Thluachuah
Kan hmuhmi thil hna zohin intuar ṭahthiamnak thluachuah hal u sih. Raltuknak ah miburpi an hmannak le sawksam in hman a simi kum upa pawl kha kumtling tiangin nunter lonak le hring a si rihlo mi naute pawl kha i thatnak hna caah ṭap kan herh. Tlamtlinglo i a baumi sifak hna le inn le lo ngeilo mi hna i harnak zong a lian ngaingai. Kan chan tiluan i kan hmuhmi, kan ton cuahmah mi harnak hna ruangah kan ṭap a hau. Hi kong a chimhlio i bia a dongh hlanah Pope nih amah bia a ngaitu pawl i an lungput kha a lawmh ta. An phu i lungthin cu nunnemnak, zaangfahnak, naihtein umnak tiin a tahchunh i cubantuk lungput hna cu Bawinu Mary i zohchunh awktlak lungput a si i kannih vialte i cawnding mi lungput a si. Cuti a si lawngah Bawi Jesuh i zumh awktlak zultu taktak kan sikhawh lai tiah a chim i a bia a donghter.