Innchungkhar Dawtnak cu Nuamhnak Nganbik a si
Anih i aa dawhnak cu lenglei dawhnak a silo
Hla phuahthiam pa nih khuai bang lungrep ngeilo zuangzam nu tiah a phuah. Hosea 1:1, 2:4-5 chungah nu ṭhalo kong kan hmuh. A zei a si paoh ah nupi chia kong hi vun zoh ta rih usih. A mui zoh ah vancung ngaknu ko khi a lo. Thlapa lai caan i a vangmi Thlapa a lawh lengah ek le voih ngeilo ko khi a lomi, Nupi cu khuasak tintuk zeihmanh a ruat lo, eithawt lawng a duh, hnipuan ṭhaṭha le ṭamhmoihnak rimhmui man sangsang lawng a duh. A fale cu hnipuan chiahru a hrukter hna, amah tu cu saṭal ngai in innpa chakthlang a vak, mikong a va ceih, a va chuahpi mi tangka kha innchungkhorkhar ca ti umlo dawr ṭhaṭha ah a vah pi, khai supsap men le thil ṭhaṭha cawk in a hloh dih. A va umlo karah padang he an i chawkṭi i an vakṭi. A vale chungkhat pawl kha zeirel loin a um hlei ah a va hringtu nu tiang hmanh kha a serhsat rih. Pathian leiah kaa zuam a ti i, a innchungkhar kaltak in zan fatin hla ka cawng e, kaa pum e a ti. A fale cu Pathian nawl si te ko seh tiin a chiahtak hna.
A fale pawl cu, fano tlai Arpi sahngar nih a seh i a taangmi Arfa tete bang, inn a phanh ah a phunzai i a tlokciar peng. A va um caan ahcun Uico mi lawmh in a lawmh. A vapa cu a lungsituk i ka chungkhar zeidah an lawh ti zong a tuak kho ti lo. A nupi lawng a zohthla cang. Mah bantuk innchungkhar ah an fale miṭha an chuak kho bal lo ti cu a fiang ko. Chin miphun cu, unau, rualchan cingla he aa dawmi miphun kan si i kan nupile nih kan unau rualchan cingla an kan dawtpiak lo ahcun, lohtlau kan si ko cang. “Nupi ṭha nih Rual zahum, nupi chia nih Rual zapheng” timi phungthluk bia bang kan nupile an chiattuk ahcun rualchan cingla chimlo chuahṭi unau taktak hmanh nih an kan lengkai ti lo. Hlanchan ahcun hi bantuk nupi ṭhalo pawl hi cu, a hnichia le a samthih tiang putter in an mak tawn hna. A muidawh le a tungtai ṭhat, a awnem nih cun zei san a tlai ti lo.
Nupi ṭha vun zoh ta tuah usih. A hmaifang zoh cun cutluk dawh a si lo, a tungtai le a pumrua zong a ṭhatuk a si lo. A mithmai vun zoh tikah, ṭhalpi tiva ko khi a lo, fim ringriang tein, a thinlung chungah ziar ngeihnak le nahchuahnak, hakkauhnak, pakhat hmanh a umlo lengah dawtnak thinlung he a khat i, zaangfahnak lungput zong a mithmai ah a cuang rih. A mi duh le a mi huat zong hngalh khawh a si lo, Tlangval kip nih keimah ko hi a ka duh khun rua, tiah an i ruah dih. Ruahnak ngeimi le a fim deuh mi tlangval pawl nih cun mah nu lawng kha ṭhal ti ko vasih tlanh bang an tlanh cio. Tlangval nih cun mah nu hi bia a chim ah aa dawhchin lengmang tiah an ceih.
Anih i aa dawhnak cu lenglei dawhnak siloin chunglei dawhnak tu a rak si. Lenglei dawh cu chitkhat caankhat ca lawng a si i chunglei dawh cu a ziam kho lo, zungzal ca a si. Caan a sau deuh aa dawh chin lengmang. Va a ngei i fale a vun ngeih tikah cun, ka fale an rawl a ṭam sual lai, an hnipuan a chiattuk sual lai, hawi nundan thiam ve hna seh, tiah khua fakpiin a ruat. A zeilei paoh hi Pathian lawng rinh loin amah hrimhrim nih a cawnpiak hna. Zumhnak lawng hin san a tlai lo i, kan zumhnak le kan tuahnak fonhchih ahhin Pathian nih thlua a kan chuah lai. Amah Pathian lawng rinh ahcun a kan cohlang lai lo ti a hngalh caah amah ca nakin a fale caah le a innchungkhar caah a tuah zungzal. Ei le din zongah amah lawngin kau dukmak in zeitikhmanh ah a ei a ding lo. A innchungkhar he nuam tein an ei ṭi peng.
Dawtnak a ngeihmi hi a ka lawng siloin a langhter kho peng. Zeitik hmanhah mithmai chia in a um bal lo i a thinhun zongah ka thinhun hi ka chungkhar nih an hngal sual hna lai kaw tiin aa ralring peng. A vapa zong a upattuk lengah a vapa sahlawh rualchan cingla zong kha amah chungkhat nakin a dawt deuh hna, a upat hna i a zaangfah hna. Kaa lawng siloin a tuahsernak in a langhter kho peng. A vapa zong nih a nupi tuahsernak a hmuh tikah a vun cawn ciammam ve i kaphnih lei in an i daw dih. Ngaichiat zongah, lawmh caan zongah hmunkhat tein, an chungkhat ning in an ṭangṭi. Nupi ṭha nih Rual zapum timi kha mah nu cung hin a tlung.
A innchungkhar zoh tikah, zeithil an tuah paoh ah nuamhnak lawng a si ko. Hlaphuah tupa nih “Innchungkhar dawtnak cu nuamhnak nganbik a si,… kan Bawipa Pathian zong lung a nuamhter” timi kha mah hna chungkhar hi an si ko. Minung kan nunchung ahhin kan Vawlei pumpi cu kan innchungkhar hi a si. Innchungkhar a nuamh lo ahcun khuazei kan kal hmanhah kan i nuam kho ve lo, kan i nuamhbik hmanhah caankhatte lawng a si lai. Innchungkhar a nuamh ahcun, kalnak kipah mithmai a hngal i thinlung a nuam kho peng. A nuammi innchungkhar sertu “Nupi ṭha” si i zuam cio hna usih. Nupi ṭha a ngeimi Pa (va) vanṭha si hna usih!