Akita khualipi le Nu Mary langhnak a ruang (1)
(Tuanbia kan rel hlanah ruah hmasa ding)
Akita cu Japan ram khualipi pakhat a si i Honshu Tikulh, Tohuku Ramkulh ah a um. Japan ram mipa pawl (men) cungah zeiruangah dah Pathian thinhunnak a ngantuk hringhran timi hi zohṭi ta u sih. 1945 August 6 le 9 ahkhan Hiroshima le Nagasaki cu America nih (Atomic Bomb) in vutcaam ah a rak canter ti kan theih. Cun (Unconditional surrender) zungzal in kan sung tiah nan ti lawnglawng ah ral kan dai lai tiah an ti hna. Japan Ram Uktupa Hirohito nih zungzal in a sung kan in pek hna a ti i ralpi pahnihnak cu a dih. Mah nithawk in, America kut tangah sal tannak in an um i 1954 ah independence an pek ṭhan hna.
Independence an ngahnak 19 hnu, 1973 thawkin Nu Mary langh hram aa thawk. Ralpi pa 2 nak lio i an thil hrawhmi vialte le America sinin independence an hmuh hnu i an thil sermi vialte le an tuah hngami vialte cu Nu Mary nih a theih dih. A thin a hungtuk mi Japan pa pawl nih mah bantuk (atomic bomb) cu an ser kho lai lo tiah aho nih dah a chim khawh lai? Vawileicung seh-hmuh lei (Technology) ah a sangbik an si cang tiah an timi hna ram an si. Atu chan ahhin Hiroshima le Nagasaki i thlakmi Bomnak in let 1,000 a ṭhawng deuhmi (1 bomb) an ser khawh cang ti a si. Japan pa pawl nih an i timhtuah mi le America miphun cung i thil tuah an i timhmi vialte cu ahohmanh nih kan thei kho lo, sihmanhsehlaw Nu Mary nih a rak hmuhdih cikcek cang. Japan nih America cu vun lehrulh ṭhan hna sehlaw vawleicung minung vialte ca zongah zeitluk in dah harnak kan tawn ve hnga ti cu Nu Mary nih a theih caah 101 tiang a miṭhli a luan ter i (warning) a pekmi hna cu a si.
Janpan Ram, Akita khualipi i Bawi Nu Mary a langhnak kong a tlangpi
1973 June 12 ni ah Bawi Nu Mary langhnak hi theitlei thil pakhat in aa thawk. Mah ni ahhin Sr. Agnes Katsuko Sasagawa nih ruah lopi in khuaruahhar taktak a simi mei ceupi Bawipa thisa kuang chung in a rak chuak kha a hmuh. Mah bantuk meiceu pi cu ni 3 chung pehzulh in a hmuh. 1973 June 28 ni ah Sr. Agnes Katsuko Sasagawa a keh lei kutphah chungah cross+ bantuk pungsaan a ngeimi hma ngeih hram aa thawk. A thi tamtuk a chuak i a faktuk hringhran. 1973 July 6 ni ah Sr. Agnes cu (Chapel) thlacamnak khan ah thla a cam lioah aa dawh ngaimi aw pakhat Nu Mary lem in a hung chuah a theih. Mah Nu Mary lem hi (Buddhist) lem serthiam mipa nih (Katsura thingkung in a sermi a si i pe 3 lawng sangmi a si. Mah ni ṭhiamṭhiam ahhin Akita Convent Sister pawl nih cun Nu Mary orh-lei kutphah in thidor a zut thluahmah mi kha an hmuh ve. Mah bantuk i thisen dor a zut thluahmah mi cu voi 4 tiang an hmuh ti a si.
Nu Mary lem kutphah i hma cu 1973 September 29 tiang a um i mah hnu cun a tlau ṭhan. 1973 September 29 ni thawkin Nu Mary lem i a cal le a hngawng in a thlan a chuak ti a si. 1973 July 6 ni ah a voi 1 nak Nu Mary biacah cu Sr. Agnes nih a rak theih. 1973 August 3 ni ah a voi 2 nak Nu Mary biacah cu Sr. Agnes nih a theih ṭhan. 1973 October 13 ni ah a voi 3 nak Nu Mary biacah cu Sr. Agnes nih a theih ṭhan. 1973 January 4 ni thawkin Nu Mary lem cu a miṭhli luan hram aa thawk i kum 6 le thla 8 tiang a ṭap. Voi 101 tiang bak a ṭap ti a si. 101 a ṭahmi zong hi sullam a ngei ti a si. No. (1) hmaibik i a sullam cu Eve (Ewah Adam Nupi) a si i ahnu lei (1) pakhat cu Second Eve (Nu Mary) a si ti a si. Cun a lai fang i (0) a sullam cu hram thawhnak le donghnak a ngei lomi Pathian tinak a si. 101 nih a kan hmuhsak mi cu Eve nih sualnak ah kan luhpi hna hmanhsehlaw second Eve (Nu Mary) nih Pathian nawl ngaihnak thawngin khamtu Jesuh a hrin i, zungzal a nungmi Pathian he remnak a kan tuahpiak ṭhan tinak a si.
—Kan pehṭhan te lai…