Thluachuah Rosung

Nu le pa

            Nu le Pa cu fale caah Nika le Thlapa pahnih i bawm in a ceumi bantuk an si. Nu le nih Thlapa bang, zaangfah dawtnak puan in an zual an khuhchilh hna i Pale hna nih kaam lo Niceu bangin thazaang a chap piak. Nu le cu thlaikho belh phoihpiaktu an si i Pale cu a kung a ṭhannak le ṭhawntertu ‘Non ṭhabik’ an si. Kan ngakchiat lio tein nihin nitiang Fimchimtu, Pathian a theihtertu, chiaṭha thleidannak a hngalhtertu le cawnpiaktu an si. Cuve bangin hi leicung, caan saupi muihnak chungin ceunak lei, lanhkhawh dingah a thiangmi phunbia hna, chimhhrinnak hna le fale nih lamping kan sut, lam kan tlaunak hnga lo, a kan cawnpiaktu kan pale a simi Bishop le Siangbawi (Tlangbawi) hna i an rosung zong hi a thuktuk hringhran ve. Kutzung thiampa nih Sobul a dennak in innṭha le inndawh an chuak. Umser tupa i nawncek nalhnak thawngin Umm ṭhaṭha an chuak ve. Rili meiceu nih lam a hmuhsaknak thawngin tilawng hna cu him tein an hmuitinhnak kawltung lei an phanh/panh khawh bantukin Dum ngeitu zohkhenhnak thawngin pangpar phuntling an eng kho ve.

Cu bantukin kan nu le kan pa, kan Pa Bishop le kan pale a simi kan Siangbawi (Tlangbawi) te le Damah Sayate dihlak i, mei vanpiaknak le lam hmuhsaknak thawngin fale hna le fale Khrihfa hna zong fiangfai tein a ceumi meiliu bantuk kan si ve. Cucaah kan Bishop, kan Siangbawite, Damah Sayate le kan nu le kan pa hna cu hi vawlei cungah Pangpar cingtu (Dum congtu) kut le ceunak hrampi an si.

Kan Bawipa zong nih nu le pa, rosung a kan petu hna nawlngaih awk a kan fial. Phungthlukbia 6:20 ah a kan chimhmi cu, “Ka fapa, na Pa nawlbia kha ngai hna law, na Nu cawnpiaknak kha hlaw hna hlah!” a kan ti.

Cucaah philhkhawh lo “THLUACHUAH ROSUNG” a simi “Nu le Pa” hna kha 26 July ‘Nu le Pa’ puaini ahhin kutzaa pahnih komh in upat kan pek hna.

                                                                                                 A ṭialtu – Norbert Ca Ling (OSC)