Laudato Si (Kumpi tlin Thawngthanhnak)
Laudato Si (On the care of Our Common Home)
kumpi tlin thawng theihternak
Gen. 2:15 “Cun Bawipa Pathian nih mipa cu a lak i Eden dum chungah cun dum cu a thlawh awk le ven awkah a chiah.”
Kan hnulei kum 5 caan lio i Pope Francis nih pawngkam zohkhenh ding konglam he pehtlaiin a rak chuahmi capar (Laudato Si) timi capar kha vawleicung ramkip um Catholic Khrihfa hna sinah theih hngalhternak a rak tuah.
Pope Francis nih vawleicung um Catholic Khrihfa vialte hna sin zongah (Laudato Si) zarh tiin May 14-24, 2020 ah theihternak a tauh ṭhan.
“Hmailei a umte hnga dingmi kan fale hna caah zeibantuk vawlei dah ro vuih ta na duh hna?” tiin Pope Francis nih biahalnak zong pakhat a tuah.
Cuasicaah hi biahalnak he pehtlaiin Laudato Si (On the care of Our Common Home) zarh tiah May 14-24, 2020, a kum (5) nak ahhin vawleicung huap Catholic Khrihfa vialte hna zong nih biatak tein i tel khawh cio dingin sawm cio kan si.
Acunglei ah langhter a sicang bantukin Hakha Diocese chungum Catholic Khrihfa vialte hna zong nih mah le umnak Parish, khua, innchungkhar cio in siseh, pakhat cio in siseh thingkung kan cing cio hna lai tiah keimah pumpak zong nih kan theihter ṭhan hna.
Note: 14-24 May, 2020 nithla cu Laudato Si zarh tiah theihter a si ko nain kan Chinram kokek umtu ningcang zulhin Hakha Diocese chungah 14-24 June, 2020 thla tuah Laudato Si zarh tiin kan hman hna lai. Parish hruitu Siangbawi hna le Bupi rianṭuantu upa hna hruainak in tuah a si lai.
Bishop Lucius Hre Kung
Bishop Of Hakha Diocese