JESUH KHRIH A CUANNAK VAILAMTAH TUNG

(CRUCIFIX)

Crucifix Vailamtahnak tung kan ti tikah Minung kan sualnak caah Jesuh cu Vailamtah tung cungah a thiangmi raithawinak in thihnak a innak Zuk (milem) kha kan hmuh lai. Vailamtahnak tungpar ah‚ “JUDAH SIANGPAHRANG, NAZA-RET KHUAMI JESUH” tinak kha a tawinak in (INRI) timi ca zong kha kan hmuhchih tawn.

ALPHA LE OMEGA

Alpha le Omega timi cu Greek cacang ah a hmaisabik cafang le a donghnakbik cafang a si. Cu cafang hmannak sullam cu Bawi Jesuh aiawh a si i, Bawipa cu sertu a hramthawk le a donghnak a sinak kha a langhter mi cafang peh a si.

BAWI JESUH A THIHNAK VAILAMTAH (The Cross)

Vailamtah kan ti ahcun Bawi Jesuh hmanthlak aa tello mi Fonhnak hmelchunhnak muisam vailamtah kha a sawh. Khrihfa hna caah cun Vailamtah cu Bawipa Jesuh thihnak a innak le a thawhṭhannak a langhter mi, mitampi nih theih hngalhmi hmelchunhnak pakhat a si. Zumlotu hna hmanh nih zapi uarmi hnipuan pungsan an suai theo ve.

ZAANGFAH THIAM LUNGTHIN HMANTHLAK

Lung hmanthlak (zuk) cu Catholic pawl nih upat an pek ngaimi hmelchunhnak pakhat a si. Lungthin kha hling`e in a zelh i fei chunhnak hmape le mei muisam in an suai tawn. Minung caah Jesuh Khrih a temhinnak, a dawtnak hna kha a ṭhabik in muisam cuanter mi hmelchunhnak pakhat a si i Catholic pawl nih an uar ngaimi  a si.

I H S

I H S timi zong hi Jesuh Khrih a langhter mi a si ve. Greek holh in an ṭialmi I H Σ O Y Σ timi Bawipa Jesuh min a hmaibik cafang hna kha an lak i an langhter mi a si. Voitam deuh cu Bawipa Thisa Sacrament he hmunkhat in kan hmuh tawn.

NGA

Nga muisam hmelchunhnak cu khahlanbik Khrihfa hna hmelchunhnak hna lakah pakhat a si. Khrihfa hna kha an hrem i an thah lio chan ahcun, Khrihfa pakhat le pakhat pehtlaihnak ah ‘Nga’ muisam an i suaipiak tawn tiah kan theih bal.

FLEUR-DE-LIS

Fleur-de-lis timi cu Lily pangpar kauthuam kha a hramlei tommi muisam in hmuh a si. Pangpar kau pathuam cu Pathian pakhat i a ummi minung pathum ai-awh a si i a tomnak sullam cu Bawi Nu Mary ai-awh a si, tiah an ti.

KALHKEH (PAIKHAL) TAWH PAHNIH

Hi hmelchunhnak cu Pope le Vatican ai- awh mi tacik a si tiah mi tampi nih theih a si. Bawipa Jesuh nih Peter kha Vancung Pennak tawh a pek tak timi sullam le a changchang St. Peter rocotu Pope hna i Nawlngeihnak kha a langhter  mi a si.

THURO

Thuro cu Thiang Thlarau ai-awhtu a si ti kha Khrihfa kip nih theih a si. Asinain thuro nih Olive hnah`e kha a seh i a cawitu ahcun Pathian Veel pakhat a simi Daihnak kha a langhter mi a si.

TUU FATE

Hi hmelchunhnak cu Thianghlimnak le sualngeih lonak kha a langhter i Bawipa Jesuh a langhter duhnak a si ko. Teinak Aalan he pehin kan hmuh a si ahcun Bawipa Jesuh Thihnak a tei hmelchunhnak kha a si