Mah zumhmi Bu pakhat konglam lawng

Theithiam hna u sih

Bu pakhatkhat a silo ah mah nih zumhmi bu le midang nih zumh i diarpi mi bu a cuai va thlai ti ding a si hrimhrim lo. Bu kong he pehtlaih zongin bia i el ding a si hrimhrim lo. Bu pakhat, zumhnak pakhat kan timi hna hi sianginn cacawnnak ah cawnchawm mi zong a si lo. Atu lio na umnak na bu cungah zumhnak na ngei kho taktak maw ngei kho tak tak lo ti zong ruah hma sat ta a hau. Na zumh mi kha theih ta i zuam law, na theih hnuah zumh zong i zuam ding a si. Biatak kan ti a si ahcun, zumhnak, bu pakhat konglam he pehtlaiin ruah tikah a kautuk i an thuk ngaingai ko hna. Cu a si caah mah nih zumhmi hmanh hi theih a har ngaingai ko hna.

Bu konglam a silo ah, zumhnak kong he pehtlaiin midang hna he biaruah ṭinak kan tuah cang lai tiah naa timh a si ahcun nangmah le nangmah na zumhmi bu konglam theih hmasat i zuam ta. Mah zumhmi bu pakhat konglam lawng hmanh ruahning phunkip in theih hmasat i zuam ta a hau. Bu pakhat a silo ah phu pakhat cung lawngah na ruahnak a dih in na chiah sual a si ahcun, cu ruahnak bi in luat khawh ding i zuam ta. (Chim duhmi cu ruahnak kaupi in na bu konglam kha theih i zuam). Na theih dih cikcek hnu lawngah midang zumhmi bu he pehtlaiin biachim ṭi dingin i tim. Zumhnak konglam he pehtlaiin bu dang hna he biachim ṭi (dialogue) kan ti tikah pakhat le pakhat i zuam ding zong a si lo.

Thil dik, Biatak tu kha phukhat le phukhat i bomh in theih khawh i zuam ṭi ding a si. Cu a si caah midang hna nih an zumhmi bu konglam na theih cia lo a si ahcun zeitindah bia cu na chim khawh ve hnga? Cu ti a silo ahcun, pakhat le pakhat i zuam ding lawng (Mah bu kong lawng dirpi) naa tim lai i midang cungah teikhawh duhnak lungthin lawng na ngei ko lai. Cu ti a si ahcun kapkhat le khat bia elnak lawng a chuak lai i thinhunnak le i siknak lawng a chuak ko lai. Dawtnak le theihthiam piaknak lungthin ngeih khawh a si ti lo caah chiatnak le rawhralnak lei lawng a panh ko lai.

Ruahnak bite chung lawngah um i thil ṭhalo lawng a chuah ding na theih ko a si ahcun Bu dang hna he biaruah ṭi dingah naa tim ko rih lai maw? A silo ah thil ṭha chuah khawh ding caah tah zuamnak lungthin na ngei kho lai maw? Biatak in kan ruah a si ahcun zeibantuk zumhnak paoh nih thil ṭha cuah khawh cionak ding lawng an i tim cio ve hna i, an biaknak chung tuah sernak si hna seh, hruai ningcang siseh, ṭhatnak lei lawngin an i cawnpiak cio ko hna. Cu a si caah, mah nih tuah sual, palhsual ruangah mah nih zumh lio komi bu hmai chiatnak a petu na si sual ahcun, i ngaichih ṭhan thiamnak lungthin zong ngeih khawh i zuam ko. Palhsual a sile mah nih palhmi cungah ṭavuan lak ngam ding a si ko. Cuti a si ahcun, kapkhat le kapkhat (Bu khat le bu khat) cungah i theihthiam piaknak a um lai i “Daihnak” leiah lam kan panh ṭi kho ko hna lai.

By. Fr. Fidelis