CBCM Thanhca
Catholic Bishop’s Conference of Myanmar (CBCM) Ca Thanh
COVID-19 zawtnak in i runvennak caah le zawtnak a karh lonak ding tiah Myanmar ram pumpaluk Bishop hna zunginnpi a simi CBCM zung nih Myanmar ram Catholic zumtu hna sinah thawngthanhnak le lamhruainak ca cu 16 March, 2020 ni ah an chuah. Cu thanhca ahcun;
1. COVID-19 zawtnak hmelchunhnak a simi taklinh, cumpit, or fah/ hrum fah, khuh, kik tlaih tibantuk in a zawmi hna nih mah le inn ah um in mi tamnak hmunah umlo ding le biakinn ah i pumlo tein inn ah um ter hna ding.
2. Cuticun Biakinn ah i pumlo in mah le umnak hmun in Zarhpi ni rel dingmi Bible rel in Pathian he i komhnak, lungthin chungin Bawipa thi le sa cohlaannak tuah ding.
3. Kanmah kan umnak hmun kan innchung in siseh, biakinn in siseh, (a). COVID-19 in a zawmi hna le hi zawtnak in a nunnak a liam hna caah thlacam piak ding. (b). Hi zawtnak a thlawpbultu sibawi hna, sii sayamah hna le ngandamnak lei ṭuanvo ngeimi hna caah thlacam piak ding. (c). Vawleicung sii lei thiamsang hna nih COVID-19 zawtnak a damhkhotu sii an hmuhchuah zau khawhnak hnga thlacam piak ding.
4. Nifatin Missa raithawinak ah hi hna caah thla kan campiaknak thawngin vawleicung minung unau kan sinak le thinkhat lungkhat kan sinak langhter ding.
5. Missa raithawinak tuah tikah tuah hrimhrim dingmi (a) Caan zei mawzat chung, Biakinn luhnak innka hram i chiah tawnmi Tithiang kha chia ti lo le tawngh lo a si rih lai. (b) Missa chung i daihnak hmelchunhnak tuah tikah kut tlaih a si lai lo i kut tlaih canah lukun a si lai. (c) Bawipa thi le sa ei tikah kut in cohlaan dingah forhfial/ thapek ding. (d) Tlangbawi le a bawmtu hna nih Bawipa thi le sa an pek hlanah siseh, an pek dih hnuah siseh an kut thiang tein i ṭawl ding. (f) Thianghlim zuk/lem hna tawngh lo ding, hnamh lo ding. (g) A thiang cacawn ni li ni zanlei keṭawlnak tuah a si lai lo. (h) Good Friday (Bawipa Jesuh thihni) i vailamtah upat peknak ah hnamh lo ding. Upatpek a duhmi nih lukun khukbilh in upatpek ding. (i) Paska puai (Holy Saturday) Zarhte zaan kha 5:00pm in 7:00pm karah tuah ding. Midnight Mass a um lai lo. (j) Biaknak caah hmanmi hmunhma le thilri hna hmannak a dih in thiang tein ṭawl dih ding. Tlangbawi hna le zumtu Khrifa hna atu le tu kut thiang tein i ṭawl ding. (k) COVID-19 hi tangka tlap zongin aa chawnh khawh tiah WHO (vawlei thiamsang sibawi) hna nih an chim. Cu a si caah biakinn ah a hluukhaan mi hna nih Mask (hmaikhuhnak) hman a si lai i Alcohol a telmi kut ṭawlnak sii he thiang tein kut i ṭawl ding. (k) Puanṭhan in khammi sualthlahnak ṭhutnak lawngah Tlangbawi le sualthlahtu nih sualthlah ding. Sualthlah tikah Tlangbawi le sualthlahtu an pahnih in hmaikhuhnak (mask) i khuh ding. (l) Zumtu Khrifa hna nih biakinn chung an luh hlanah anmah te cio in mask (hmaikhuhnak) i khuh dih ding, cun biakinn chungin a leng chuah tikah an hman ciami hmaikhuhnak le tissue hna kha ningcang loin hlonh loding. (m) Biakinn luhnak innka hram ah alcohol 70% a telmi kut ṭawlnak sii chiah ding.
6. Hi zawtnak (COVID-19) tei khawhnak dingah vawlei cung ram hruaitu hna le Myanmar ram hruaitu hna nih a sikhawh chungin an i zuam lio. Ngandamnak Vuanci le zaanglek lentecelhnak Vuanci hna nih lamhruainak le forhfialnak ah lungtak in i tel ve ding le zulh ding. (a) Atu lioah Biakinn ah siseh, Hallkhaan ah siseh tuah dingin timhlamh cia a simi , meeting, tindaante hna, rawldum puaite hna le mitampi hmunkhat ah i pumhnak hna a ni ṭhial ding (or) tuah loding. (b) Chiat ni, ṭhat ni ah (thih loh ton tikah siseh, a dangdang puai tuah tikah siseh) mah le chungkhar khat deuh lawng in a bitnak le a tawinak in tuah ding. (c) Pathian bia cawnnak, lengkhawmh pumhnak, le cawnpiaknak tuah loding, (d) Cubantuk ṭhiamṭhiam in mi tampi (mibu) he tuah tawn mi Tlangbawi Ordination, Jubilee puai, Biakinn puai, Mithiang hna puai, thil pakhatkhat caah thluachuah hal le pekchanh puai, Bawinu Mary puai hna vialte zong puaini ṭhial piak ding , a si loah tuah loding. (e) Thli thiang ṭha tein hmuh khawhnak ding caah thlalang awng le innkaa hna kha hun ding.
7. Thinphang thather i um hi virus nakin a zualhma in ṭihnung deuh a si caah ralrinnak he i runven buin dai tein Pathian sinah zumhnak he i bochan ding. (a) Zumtu Khrihfa hna nih Bawipa Thi le Sa biaknak in damnak an hmuh khawhnak hnga biakinn le Bawipa Thi Sa biaknak inn (Adoration Chapel) Bawipa Thisa hun piak ding. (b) Hi zawtnak ṭhalo chungin kan luat khawhnak caah le zumtu Khrifa hna i saduhthah a tlin khawhnak hnga, Thiang Thlarau laksawng co khawhnak hnga Tlangbawi hna nih Missa raithawinak tuah ding. (c) COVID-19 zawtnak a tuarmi bawmhnak caah ahlukhaan ding. (d) Pope Frances nih biaknak lei hruaitu tuukhaal hna kha an tuu hna pawngah um dingin a forhfial hna bantukin zulh ding. (e) Mizaw hna kha Bawipa Thi le Sa peknak, Sathau thiang thuhnak le sualthlahnak a herhmi hna kha hlawt loding.
Ralrin ding: – Mah le Diocese cio i hruaitu Bishop hna i lamhruainak le tlangtlak khuakhaannak kha zulh cio ding.
– Catholic Bishop’s Conference of Myanmar (CBCM) thawngthanhnak le thanhca a dangin a chuah hlan chung cu atu ningin zulh le fehter a si lai.