Sakta Parish Biakinn Puai
Sakta Parish ah Sakta khua ah avoi (4) nak Lourdes Bawinu Mary Biakinn puai an tuah
Avoi (4) nak Sakta Parish Biakinn puai cu hlunghlai ngaiin March 15 ni ah an tuah. Cu puaiah Parish chung um Catholic Khrihfa hna zong an si khawh chung cio in an i tel ve hna. Sakta Parish Tlangbawi Fr. James Ngun Uk hruainak in puai tlamtling tein an tuah khawhnak hnga ding caah siseh, Parish chungin Pathian rian thiang a ṭuantu an hmuh khawhnak hnga caah novena thlacamnak in timtuahnak an rak ngei. Puai ah aa tel khomi Khrihfa hna cu 150 leng an si. Puaini ah Siangbawi (4) an i tel kho hna i Fr. Emmanuel Hrang Za Uk hruainak in Missa an thawk.
Fr. Joseph Ro Nei Thang nih Pathian bia in a cawnpiak hna i Bawinu Mary Biakinn puai a si bangin, Bupi cawnpiaknak i Bawinu Mary sin Rosary thlacam ningcang le Angelus thlacam ningcang hna zong fiang tein a chim.
“Zarhpi ni Rosary thlacamnak kan cam tik paoh ah ‘Sunparnak Biathuk hman ding a si. Angelus thla kan cam tik paoh zongah dir ding a si” tiah a ti.
Fr. James Nung Uk nih: “a bik in hi puai kan tuahnak sullam cu Sakta khua nih Pathian Thluachuah kan hmuh khawhnak hnga caah a si” tiah a ti.
Parish Saya Leo Sang Hnui nih a chimmi cu: “Kan Biakinn puai kan tuah hi avoi (4) nak a si cang. Puai kan tuah tikah kan Khrihfabu chungin minung pakhatkhat nih a kan tuah piak tawn. Sihmahsehlaw, tutan cu Parish minin kan tuahmi a si bangin Parish bak nih a dih hnga ding mi vialte kan chuah” tiah a ti. Novena an tuahnak kong he pehtlaiin Parish Saya pakhat nih a chim rih mi cu: ” Novena kan tuah ni thawkin niruk a si hnuah, ngandamnak Bawinu puai a si bantukin kaa ruah lomi thil khuaruahhar tete hi an hung um. Keimah ka chungkhar hrimhrim nih kan tonmi a si” tiah a chim fawn rih.
Khuachung um nu pakhat nih a chim ve mi cu: “Novena kan tuah paoh ahhin ramchung, ramleng um ka chungkhar hna caah thla ka cam peng. Bawinu Mary nih ka thlacamnak tlam a tlinter. Novena kan tuah lio zongah Siangbawite le Saya hna nih Pathian bia a kan cawnpiak ah thazaang tampi kan hmuh” tiah a ti.
Puaini ah Bawipa Thisa vahpinak le Bawipa Thisa biaknak zong an tuah.