Pathein Diocese i Chungkhar leikam ṭuanvo ngeitu hna Hakha an phan

An Program Tawi

Pathein Diocese in Chungkhar lei he pehtlaiin rianṭuanmi phu hna cu March 13, 2020 ni ah Hakha Diocese an phan. Cu ni ṭhiamṭhiam ahcun Hakha Diocese lei in Chungkhar konglam he pehtlaiin ṭuanvo ngeitu Fr. Thomas Khua Uk Lian Mawi hruainak he Hakha khuachung um Catholic Khrihfa chungkhar cheukhat hna he Hakha Bishop zungah ton biaruahnak an ngeih hna.
Bishop Lucius Hre Kung nih tulio kan Laitlang (Chinram) um chungkhar hna i an ton cuahmah mi he pehtlaiin a chimh: “Chungkhar tampi hna cu an rak umnak khuate kha kaltak in Hakha khuapi ah an rak i ṭhial hna. Chungkhar tampi i an duhmi cu an fale hna sianginn thiamsang an kainak ahhin ṭha tein kai kho hna seh ti hi a si ” tiah a chim.

Fr. Thomas Khua Uk Lian Mawi nih: “Hiti in kan Diocese ah nan rak kan tlawng i kan i lawm tuk. Hmailei zongah hi bantukin i ton ṭhannak caan ṭha kha kan biak Pathian nih khuakhang ṭhan hram sehlaw kanmah hna zong nih kan i zuam  hna lai” tiin donnak bia a chim ve.

Pathein Diocese leiin upa pakhat nih: ” Hlan kan rak ruahning ahcun Laitlang (Chinram) kai lai ding hi kan zenh pah cio. Sihmanhsehlaw, kan hun kai taktak tikah kan ruahning bantuk si loin kan hmuh kan theihmi konglam hna nih thazaang tampi a kan ngeihter” tiah a chim.

Bishop Lucius nih ” atu bantukin kan sin nan rak rat cu Pathian Thawngṭha nan rak kan phorh hi a si. Kan ca zongah thla kan cam piak peng uh” tiah a ti hna i thlacam ṭinak an tuah. Cun Bishop Lucius Hre Kung thluachuah peknak in an program an dih ter hna.

Cun, Chungkhar lei ṭuanvo ngeitu hna nih Hakha khuachung, khua pawngah an lenpi hna tiah thawng kan theih.