Peter i Thutdan Puai

CHAIR OF ST. PETER

(Lamkaltu Mithiang Peter Siangpahrang Ṭhutdan Puai)

            Lamkaltu St. Peter i Siangpahrang ṭhutdan puai cu kumzabu pa (4) thawk tein an rak tuah hmasabik. Ṭhutdan hmelchunhnak cu a biapittuk caah Pope a ṭhutnak kha a thiangmi ṭhutdan (Holy Chair) tiah sullam a ngeimi “Pope Hmunpi” (Holy See) tiah an auh. St. Peter Siangpahrang ṭhutdan cu Bupi (Khrihfa vialte) cungah Pope cawnpiaknak nawl kha a langh termi a si. Pope cu Bupi chung um Khrihfa vialte sinah zumhnak kong a cawnpiak tik hna ah “Siangpahrang ṭhutdan” (From the Chair) in a cawnpiak kan ti khawh.

            22 February cu Rome khua ah Bishop rian a ṭuan hmasa ni a si. Hlanlio pupa hna cawnpiak ningin le tette ningin Missa an tuah tikah St. Peter nih a rak hmanmi lungphel ṭhutdan cu St. Peter Biakinn a cungbik (Biakinn par) i thlapa cheu pungsan a khan pakhat ah an khumh i an tuamchih tiah kan theih.

            Khrih pumpak hrimhrim nih St. Peter kha amah a changtu hna a changchang in cawnpiak chinnak nawl a rak pek. Galilee rili kam ah Jesuh nih (Mt. 16:18-19) ah “Nang cu lungtum, Peter na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo. Vancung Pennak, hunnak tawhfung zong cu kan pek lai i vawleicung i na hrenhmi cu Vancung zongah hrenh a si lai i vawleicung i na awnh mi cu vancung zongah awnh a si lai,” tiah a rak ti.

            Mithiang Peter bantukin vawleicung i Pope (266) hna cu mithiang Peter i Siangpahrang ṭhutdan cungah an rak ṭhu i zumhnak le tuahnak hna cawnpiaknak ah zeitik hmanh ah an rak palh bal lo.