26-1-25 (3rd Sunday Reflection)
Nehemiah 8:2-6, 8-10
1Cor 12:12-30, Lk 1:1-4, 4:14-21
Nihin a vokhatnak Bible kan relmi ah, Pathian Bia kha a chimtu a reltu nih zapi theih fian awk in tliang te le fiang tein chim le cawnpiak awk a herhnak kong kan theih. Ram uktu Nehemiah le tlangbawi le cazi asi mi Ezra nih an mipi hna kha Pathian biathiang in thazaang an peknak hna le Bawipa ah lunglawm thanuam in zumhnak fek he an um khawhnak hnga le zeithil hmanh tlung ko aikun ngaihchia lungdong lo tein Bawipa cung ah bochannak he um dingah forhfialnak an tuahnak kong kan theih. Zumhnak he vancung ram lei khual tlawngmi kan si bangin a caancaan ah thazaang a der kho mi kan si. Pathian kan zumhnak ah derthawmnak kan ngeih caan tampi a um tawn. Cubantuk in pumsa thlarau kan derthawm caan ah biaknak lei in hruaitu hna siseh, vawlei lei in khua le ram hruaitu hna lei in siseh, thazaang pek thiamnak pahrang hi a biapi tuk ve ti mi zong a kan theihter. Harnak le khuaruahhar vasaang in kan caan ah kan biakmi kan Pathian sin in hnemhnak le hnangamnak hi kan i ruahchan bikmi asi caah hmuh khawhlo mi Pathian le minung karlak ah palai, ai-awhtu asi mi hruatu hna mipi nih an aw-aan hi kan ruahchannak he kan hngak cio tawn.
Avoi hnihnak Bible kan rel mi chung ah, Khrihfa bu cu Khrih i a pum asi. Kan pum chungah ṭeng nge tete an um in cu pum ṭeng nge hna cu pakhat le pakhat an i pehltaihnak kong, Khrihfabu le pumṭeng nge bianabia kong kan theih. Minung pakhat nih zeibantuk fimthiamnak ngei ko hmanhsehlaw, a mah pakhat lawng nih zeizong te a tuah kho lai lo. Cu caah Khrihfa bu ah siseh, community ah siseh, veng le sang ah, khua le ram ah siseh, a dotdot le mah le thiamnak cio hmang in ṭuanvo i pek cio asi. Cucu (sharing responsibility, တာဝန်ခွဲဝေပေးခြင်း) tiah auh asi. Khrihfabu kan i ṭhit hruainak ah, kan zapi tein siangbawi, saya le pastor si dih a hau lo. Kan zapi tein hruaitu si dih a ngah lo. Kan zapi tein hruaitu lutlai si duhtukna lungput a ngei mi kan si ahcun cu Khrihfabu, inchungkhar, khua le ram ah buainak le i dohkalhnak a chuak zungzal lai. Kan mah le kan pahrang cio tein, kanmah le kan dirhmun cio tein kan ṭuanvo cio te kha ṭha tein kan ṭuan cio lawng ah kan umnak Khrihfabu le khua le ram ah ṭhanchonak a um lai. Saya le hruaitu a um lo nak bu le le khua le ram cu zaangfak an si i zeicah tiah mi a ṭhihruai khotu mifim mithiam an um lo ruangah asi. Sihmanhsehlaw, cu nak in a zual deuhmi cu, keimah hi ka fim ka thiam i keimah lawng hi hruaitu ka si awk asi tiah hruaitu lei bawiṭuan aduh tukmi an tamtuknak Khrihfabu le khua le ram ah buainak a tam chinchin. Thiangthlarau umpinak a umlonak hmun i hruaitu si a duhtuk mi nih ṭhencheunak a chuahpi. Cu ruangah mithiang Paul nih a kan cawnpiak mi cu Khrih cu Bupi lu asi, Bupi cu Khrih i a pum asi. Kan nih cu Khrih pum i a ṭeng nge kan si. Kan fim kan thiamnak, kan pahrang hi ai khat cio lo ruangah kan pahrang ning tein Khrih le a bupi caah rianṭuan awk asi. Zuamcawh entainak, duhfah ziar ngeihnak lungthin he Khrih pum ṭeng nge si a ngah lo tiah a kan cawnpiak. Toidornak lungthin le lungthin ṭha le, nawl ngainak he rian kan ṭuantik ah lawng Khrihfabu le veng le sang khua le ram ah ṭhanchonak le dawtnak a karh lai. Mah lawng nih zei le zong ṭuan dih phung asi lo. ~uanvo i phawt cio a hau, cu ṭuanvo cohlan hnu cun ṭuan bak ve a herh. Mah ṭuan duhmi lawng ṭuan i a har mi le a miak a um lo mi rian ah i ziaphial in um phung asi lo tiah a kan cawnpiak.
Cun nihin thawngṭhabia kan rel mi chungin kan theih mi cu, Khrih kan siangpahrang cu ther lengmang le phang lengmang in a kan umtertu asi lo. saltaannak chungin a kan chuahtu, kan zawtnak chungin a kan damhtu le, kan derthawmnak chungin a kan chanhchuah i ṭhawnnak a kan petu Bawi, zungzal a nungmi Pathian Fapa si i mi vialte nih kum tampi an rak hngahmi khamhtu mesiah asinak kong kan theih. Sal ah a taang bal lo mi nih saltaannak chung in khamh mi kan sinak a man an thei hnga maw, a zaw bal lo mi nih damh kan sinak a man an thei hnga maw, a derthawm bal lo mi nih derthawmnak chung in ṭhawnnak pek kan si mi a man hi an thei kho hnga maw?
Pathian hmai ah, Pathian hmuhnak ah saltaangmi kan si, a derthawmmi le a zaw mi kan si, Pathian hmai ah miṭha lo le misual lawngte kan si dih. Kan sinak phunzakip chung in a kan chanhchuahtu le a kam khamhtu Bawipa cu zungzal in thangṭhat usi law, amah lawng hi bia ko usih. RVA HakhaChin a ngaitu vialte Bawipa nih thluachuah in pe ko hna seh.
Kan Program dihlak zohnak Link >>>https://youtu.be/Asuvndd_GHQ