10 October, 2025 Friday

📖Joel 1:13-15, 2:1-2; Luke 11:15-26

Jesuh le Beelzebul

India tar pakhat nih zankhat cu mi vialte chung i a cangmi ral kong a tupa sinah a chimmi tuanbia hi ka rel. A chimmi cu, “Ka fapa, ral cu kan dihlak chungah a ummi cianghngia pahnih karlak ah a si. Pakhat cu Ṭhatlonak a si. Cucu thinhunnak, nahchuahnak, ziarngeihhnak, ngaihchiatnak, lunglawmh lonak, hakkauhnak, porhlawtnak, mah le mah i zawnruahnak, sualphawtnak, thinhunnak, i niamternak, lihbia, ahmaan lomi porhlawtnak, cungnung deuhnak le mah le mah i porhlawtnak” hna an si.

A dang pakhat cu aṭha. Cucu “lawmhnak, daihnak, dawtnak, ruahchannak, lungdaihnak, toidornak, zaangfahnak, mi ca i aṭhami thil tuahnak, zawnruahnak, i siannak, biatak, zangfahnak, midang zawnruahnak le zumhnak hna” an si. A tupa nih minit pakhat chung a ruah hnuah a pu cu “Zei cianghngia nih dah teinak a hmuh?” tiah a hal. India tarpa nih cun hitin a leh sawhsawh: “Na cawmmi kha.”

Jesuh cu mi vialte nih an duh dih lo. Tahchunhnak ah, nihin thawngṭha chung i Farasi mi hna bantukin, Jesuh cu khuachia bawi Beelzebul ṭhawnnak he khuachia a ṭhawl hna tiah sual an phawt. Beelzebul cu hlanlio Israelmi hna i ral a simi Filistin mi hna i an pathian nganbik a si. Jesuh chan ahcun, khuachia bawi timi min a ngei cang. Phungbia cawnpiaktu saya hna le Farasi hna i mithmuh ahcun Jesuh nih thil dik a tuah kho bal lo.

Cucaah Jesuh nih an sualpuhnak kha hitin a leh hna: “Pennak cu aa ṭhencheu ahcun a rawk lai i inn pakhat le pakhat an i do lai,” (v. 17). Khrih kha a ral pawl nih an puh bantukin khuachia ṭhawnnak in a ṭhawlmi a silo ti langhternak caah a chimmi a si. Cucaah Khrih nih Khrihfabu dihlak lungrualnak caah fakpiin thla a cam. “Mi vialte cu pakhat an si nakhnga” tiah a ti.

Nihin kan karlak ah lungrual lonak a chuahnak a ruang pakhat cu mi he kan i komhning ruangah a si. Cun midang he i komh le i pehtlaih cu kan cawn awk a biapi bikmi thiamnak pakhat a si. Dr. Norman Vincent Peale nih a Nifatin Nunnak caah Thazaang Petu Cakuat ah zeitindah tuah ding a si timi ruahnak cheuhnak cheukhat a pek:

1) Mi dawt kha cawn. Mah cu ahmasa ahcun i zuam a hau, zeicahtiah mi cheukhat cu dawt awk tlak an si lo. Asinain mi vialte kha hngalh taktak awkah na cawn tikah dawt awk tlak ziaza an ngei ti kha philhhlah.

2) Mi sinah thangṭhat awk thil pakhatkhat kawl. Hihi ziaza ah ser. Midang soisel duhnak lungput kha thlen.

3) Mi zumh kha i cawn. Cun na zumh hna kha langhter hna. Cheukhat nih an in hlawh a tling lai lo nain, a tam deuh ahcun nangmah cungah aa tlakmi zumhnak an ngeihter hna lai. Na lungthin chungah minung ser hna. Nangmah nih na duh deuh hna lai, cun annih zong nih an in duh deuh ve lai, zeicahtiah an cungah na upatnak nih anmah le anmah an i hmuhning a ṭhanter.

4) Midang bawmh kha i cawn. Na tuah khawh tawk ningin nifatin thil pakhatkhat tuah. Lehnak zeihmanh i ruahchan hlah. Hihi mi he zeitindah i remh khawh a si ti cawnnak ah a fek bikmi lam a si.

5) Na duh lomi hna min kha ṭial hna. Pakhat cio kha an min in thlacam piak hna law ngaihthiam hna. Na lungthin chungin, an sinah va phan law dawtnak in kulh hna. Thlacamnak in a chuakmi ṭhawnnak pakhat a um i, cu nih cun mi a hnorsuan hna. Na khuaruah a har men lai.

6) Mi hna i an chuahni ah siseh, an fale kong siseh, asiloah an hlawhtlinnak dangdang kongah siseh, lawmhpinak caanṭha na hmuh tikah ralring tein um. Lungtak tein tuah.

7) Mah le mah i hngalhthiamnak vialte nih an kaltak khawh nakhnga le mi he nan um tikah nangmah le nangmah aa lawmmi, a sining tein le a luatmi na si khawh nakhnga nifatin thlacam.

Dr. Norma Vincent Peale ruahnak cheuhnak hna hi kan nunnak ah kan ngeih ahcun, kan chung i a ummi cenghngia ṭha le kan lakah Pa saduhthah a tlin khawhnak ding lungrualnak kan cawm tiah kan ti khawh.